BUKSAN na sa publiko ang unom (6) ka viewing chapels sa padayong gipalambo nga City Memorial Park o’ kanhi Bolonsiri public cemetery sa Brgy Camaman-an ning syudad.

 

 

Sa taho ni Engr. Armen Cuenca, hepe sa City Local Environment and Natural Resources Office (Clenro) atol sa flag raising ceremony karong buntag, iyang gipahibalo nga buksan ang 6 sa 12 ka viewing chapels karong Oktubre 28 sa pagpangulo ni Mayor Rolando “Klarex” Uy.

 

Dugang pa ni Cuenca, ang maong chapels maoy tubag ug makatabang sa mga indigent nga mga molupyo sa syudad nga sarang mogamit sa mga kadalanan alang sa paghaya sa ilang mga mipanaw nga kabanay tungod kay walay lugar sa ilang panimalay.

 

Lakip usab sa serbisyo sa City Memorial Park ang 3 ka bag-ong sakyanan nga mahimong kargahan sa mga patay sa tinguha usab nga mahatagan sila og disenteng paghatud sa katapusang pahulayan.

Tungod niini, malaumon ang kagamhanang lokal ubos sa administrasyon ni Mayor Klarex Uy nga mahagkap ang mga nagsubo tungod sa kamatayon sa ilang mga mahal sa kinabuhi. (ACM/Photos by ROEL FELICITAS and REYNAN BAYLIN/CIO)