MISMO si City Mayor Rolando ‘Klarex’ Uy ang nangulo sa pagbukas sa Philhealth KonSulTa (Konsultasyon Sulit at Tama) program sa Lapasan heatlh center human gitunol sa kadagkuan Philippine Health Insurance Corporation Region 10 ang accreditation certificate ngadto ni Kapitan Julito Ogsimer, Oktubre 14 ning tuig.

 

 

Malipayong gitunol ni Mr. Marlon Arrabaca, hepe sa Local Health Insurance Office – Cagayan de Oro ang maong accreditation certificate sa kagamhanang lokal sa Cagayan de Oro sa pagpangulo ni Mayor ‘Klarex’, Vice Mayor Jocelyn Bebot Rodriguez, Councilor Maria Lourdes S. Gaane ug sa mga opisyales ug konseho sa barangay sa pagpangulo ni Kapitan Ogsimer.

 

Dumduman ang Lapasan health center ang ikalima nga pasilidad nga pormal nang gibuksan isip Philhealth KonSulTa provider human ang Lumbia infirmary, Carmen health center, Nazareth center ug City Health Office, ug sa di madugay buksan na usab ang Tablon health center.

 

 

Atol sa kalihukan, nagpasalamat si Mayor ‘Klarex’ sa mga kadagkuan sa Philhealth sa kanunay nga suporta sa pagpalambo health care system sa syudad, ingon man sa 20th city council, barangay LGU, doctors, nurses, barangay health workers, barangay nutrition scholars, community development volunteers ug sa katawhan sa suporta sa programa sa panglawas sa gobyerno.

 

Giawhag ni Mayor Klarex ang katawhan sa Lapasan ug kasikbit nga barangay nga pahimuslan ang KonSulTa program.

 

Sa laing bahin nanawagan usab si Mr. Arrabaca sa Philhealth X sa mga BHWs, BNS, CDVs sa pagkumbinse ug pag-edukar sa katawhan kabahin sa KonSulTa program aron kini mapahimuslan.

 

Ang KonSulta program usa ka outpatient health services sama sa konsultasyon sa doktor, health risk screening & assessment, select laboratory & diagnostic test ug select drugs & medicines ngadto sa Philhealth members ug mga dependents niini nga nakarehistro sa usa ka KonSulTa provider facility nga iyang napili.

 

Lakip misaksi sa aktibidad si Dr. Efren Celeste, acting City Health Insurance Officer, Mr. Abdul Obedi S. Alip, Social Insurance III sa Philhealth X, City Health Officer Dr. Rachel Daba Dilla, CHO consultant Dr. Fe Bongcas, JR Borja General Hospital chief Dr. Michael June Perez (AGP/Photo by Jay Arancon/Layout by Rod Constantino/CIO)