MOKABAT sa 2,968 ka indibidwal o’ 762 ka pamilya ang naapektohan sa baha nga miigo Domingo sa hapon diha sa barangay Bugo ug Puerto ning syudad, sigun pa sa taho sa City Social Welfare and Development Office.

 

Adunay 70 ka pamilya o’ 253 ka indibidwal ang mihikling sa ilang panimalay ug anaa karon nagpasilong sa Bugo National High School, samtang 457 ka pamilya o’ 1,814 ka indibidwal ang anaa karon sa Bugo COBSAT Suntingon Elementary School, ug 235 ka pamilya o’ 901 ka indibidwal ang anaa karon sa barangay Puerto covered court.

 

Una nang nagpahimutang kagabii og community kitchen ang CSWD ubos sa pangpangulo ni Acting CSWD Officer Annie Tongson aron mahatagan og alibyo ang mga biktima sa baha.

 

 

Midonar usab sa sliced breads si Liga ng mga Barangay President Yan Lam Lim, lakip na ang pipila ka silingang barangay pinaagi sa pakigkoordinar ni Mayor Klarex diin mihatag sa lugaw ang barangay Gusa pinangunahan ni Punong Barangay Marlon Tabac; instant noodles ug itlog ang barangay Carmen pinangunahan ni Punong Barangay Lorna Uy; ug champorado ang barangay Agusan pinangunahan ni Punong Barangay Andrew Melliza, lakip na ang pipila ka private organizations.

 

Kamulo pa karon sa profiling ang CSWD sa mga evacuation centers. (NLB/CIO/Photos by Reynan Baylin/CIO and April Lorenzana/CMO)