Gipahibalo ni Engr. Armen Cuenca, Executive Director sa Task Force for the Emancipation of Piso-Piso Beneficiaries (TFEPB) nga nagpadayon ang titling program sa syudad ubos sa administrasyon ni Mayor Rolando `Klarex’ Uy.

 

Sa pagkamugna sa TFEPB, lakip sa natitulohan ang mga yuta nga gipanag-iya sa syudad sama sa City Central School, Amphi Theater, tibuok Divisoria, Gaston Park, City Jail sa Brgy Lumbia ug City Hall, diin wala kini titulo sukad nahimong Chartered City ang Cagayan de Oro.

 

Nahimo lamang kini ubos sa administrasyon ni kanhi Mayor Oscar Moreno, ug karon gisuportahan ug gipadayon ni Mayor Klarex Uy ilabina nga usa sa iyang priority agenda ilawom sa RISE CDO Agenda ang paghatag og kaugalingong yuta ug kapuy-an sa mga informal settler families (ISFs) ning syudad.

 

Samtang duha ka housing projects nga mao ang Balangay Pangandoy sa Tibasak Barangay Macasandig ug ang Cagayan de Oro Resettlement Socialized Housing Project (CDORSHP 4) sa Barangay Balubal ang nasulod na sa Regristry of Deeds alang sa segregation sa titulo human na-aprobahan ang ilang subdivision plan.

 

 

Alayon niini, giaghat ni Engr. Cuenca ang mga molupyo sa maong housing projects nga magpatitulo na sa ilang mga yuta aron makabaton na sila sa security of tenure.

 

Dako usab ang pasalamat ni Eng. Cuenca kang Mayor Klarex nga adunay dakong panglantaw sa kahimtang sa katawhan uban sa suporta sa 20th City Council pinangulohan ni Vice Mayor Jocelyn ‘Bebot’ Rodriguez. (ALR/CIO/Photos by Roel Felicitas & CMO))