MITALA og pagsaka sa mga active cases ang Cagayan de Oro sugod sa nilabay’ng semana kon itandi sa duha ka semana na ang nakalabay basi sa taho sa City Health Office (CHO).

 

Matud ni City Epidemiologist Dr. Teodulfo Joselito Retuya Jr sa City Health Office, mitala og 17 cases Average Daily Attack Rate (ADAR) ang syudad sugod sa October 16 hangtud Oct 22 kon itandi sa 7 cases lamang nga ADAR sa mga nilabay’ng nga semana ning bulan.

 

Dugang ni Dr Retuya ang pagsaka sa kaso nagikan sa mga health workers ug mga authorized persons outside of residence (APOR) nga gikan nagtambong og kalihukan ingon man mga hospital workers sa pribado ug pampubliko’ng tambalanan.

 

 

Lakip usab sa mga ihap sa active cases ang mga persons deprived of liberty (PDLs) nga kasamtangang anaa na sa mga temporary treatment and monitoring facility (TTMF).

 

Subay niini, hugot ang pahimangno ug hangyo sa administrasyon ni Mayor Rolando “Klarex” Uy pinaagi sa CHO ngadto sa katawhan nga mag-amping kanunay ug sundon ang minimum public health standards ilabina ang pagsul-ob og face masks kanunay panahon nga mobisita sa mga sementeryo panahon sa All Saints and All Souls Day nga posibleng hinungdan sa pagtaas sa kaso sa COVID 19. (ACM/CIO)