Sa tumong nga madugangan ang mga barangay tanod sa nagkadaiyang barangay ug mahulipan ang mga nag-undang, gihangyo sa Liga ng mga Barangay si Mayor Rolando `Klarex’ Uy nga mabalik ang training sa mga tanod.

 

Si Punong Barangay Marlo Tabac sa Barangay Gusa ug kasamtangang Vice-Chairman sa Liga ng mga Barangay, personal nga mipadangat niini nga hangyo kang Mayor Klarex atol sa usa ka meeting kalabot sa pagpangandam sa Undas 2022 sulod sa buhatan sa mayor.

 

Matud ni Kapitan Tabac nga daghan na nga mga tanod sa iyang barangay ang niundang apan dili diretso nga mahulipan kung walay Basic Orientation Seminar pinaagi sa Barangay Tanod Development Committee sa pagpangulo sa Cagayan de Oro City Police Office (Cocpo).

 

Dugang ni Kap. Tabac dili lang ang iyang barangay ang adunay kakulangon sa mga tanod apan tanang barangay busa angayan lang nga mabalik na ang orientation training aron mahulipan ang nangundang nga mga tanod.

Ang mga barangay tanod nga nakapailawom sa orientation seminar ug opisyal nga maka-function sa iyang barangay makadawat usab og honorarium gikan sa syudad.

 

Kini nga hangyo ang gikonsiderar ni Mayor Klarex ug namahayag nga iyang hinabion si City Councilor Romeo Calizo nga maoy chairman sa Committee on Peace & Order kalabot niini.

Samtang mapasalamaton ug malaumon ang Liga ng mga Barangay nga masugdan ang training sa dili madugay. (ALR/CIO/Photo by Rod Constantino/CIO)