Gidid-an na ang mga sidewalk vendors nga mamaligya sa dalan JR Borja hangtod sa JR Borja Extension, partikular na sa Cogon Market area, sigun sa pamahayag ni Mayor Rolando `Klarex’ Uy atol sa flag raising ceremony sa city hall, Lunes, Nobyembre 7, 2022.

 

Kini human nagmagahi ug wala naminaw sa iyang hangyo ang mga sidewalk vendors nga mosunod kanunay sa balaod ug kinahanglan walay maperwisyo samtang sila namaligya.

 

Matud ni Mayor Klarex nga iyang nasabtan ang panginahanglanon sa mga sidewalk vendors ilabina sa ilang panginabuhi hinungdan nga iyang gitugotan nga makapamaligya daplin sa dalan, uban sa hangyo nga limpiyohan usab nila ang area nga ilang gibaligyaan.

 

 

“Apan sa upat ka bulan ug tunga wala nila tabangi ang ilang kaugalingon mao nga mangayo ako og pasaylo kay ipatuman ko gayud ang balaod,” dugang ni Mayor Klarex.

 

Nasayran nga mihimo’g surprise inspection si Mayor Klarex sa Cogon market niadtong Sabado sa gabii uban sa mga kadagkuan sa Roads and Traffic Administration (RTA), City Economic Enterprises Department (CEED), ug kapulisan diin iyang nakita ang gubot nga sitwasyon kay halos gi-okupar naman sa mga sidewalk vendors ang tibuok dalan sa JR Borja ug maglisod na pag-agi ang mga sakyanan ug mga tawo.

 

Makigtigom pa si Mayor Klarex sa mga kadagkuan sa CEED, RTA, ug uban pa nga mga dep't managers sa city hall, Cocpo, Cepalco, ug mga punong barangay ugma, Martes, Nobyembre 8, alang sa pagpatuman sa iyang kamanduan. (ALR/CIO/Photos by Rod Constantino/CIO & CMO))