ALAYON sa ipahigayon nga November 2022 Bar Examinations dinhi sa dakbayan, ipatuman sa lokal nga kagamhanan ang liquor ban sulod sa 100-meter radius sa Xavier University - Ateneo de Cagayan.

 

Sugdan ang maong liquor ban Martes sa gabii, sugod alas 8:00 hangtod ugma Nobyembre 9, alas 8:00 sa gabii.

 

Samtang, ipatuman usab ang susamang ban sa Nobyembre 13, 16, ug 20 sugod alas- 12:01 sa buntag hangtod alas 8:00 sa gabii.

 

Ang maong gabayan basi sa gipirmahan ni Mayor Klarex Uy nga Executive Order No. 114-2022 alang sa malinawon nga pagpahigayon sa Bar Examinations.

 

Sa laing bahin, ubay-ubay usab ka mga dalan nga duol sa nasangpit nga unibersidad ang temporaryong sirad-an basi sa Executive Order No. 116-2022.

 

 

Gipatuman ni Mayor Klarex Uy ang mga gabayan agi’g tubag sa hangyo sa Supreme Court nga magpatuman og liquor ban ug temporary road closures.

 

Kahinumduman nga ikaduha na kini ka higayon nga adunay local testing center dinhi sa syudad human napili sa Supreme Court ang Cagayan de Oro isip usa sa mga bar sites sa regionalized Philippine Bar Examinations. (SPPalen/CIO)