Dako ang kalipay sa mga seasonal vendors human ilang nakita ang lugar diha sa Rotunda sa Rodelsa Circle area diin sila gipahimutang ni Mayor Rolando `Klarex’ Uy atol sa gipahigayon nga site inspection uban sa Night Market Committee, Martes, Disyembre 13, 2022.

 

Ang walo ka grupo pulos nakauyon sa ilang mga puwesto ug mipaabot sa ilang pasalamat ngadto kang Mayor Klarex. Gani, pipila kanila ang nakahukom nga magsugod na og baligya ugmang adlawa.

Usa sa ilang gikalipay kay mahimo silang mamaligya 24 oras. Apan hangtud lang sa Disyembre 31, 2022, sigun sa ilang sulat hangyo kang Mayor Klarex.

 

 

Nunot niini, gipahibalo sila ni Atty. Jose Edgardo Uy kalabot sa mga gabayan partikular na sa paghipos sa ilang basura ug ang pagpanglimpiyo sa ilang tagsa-tagsa ka puwesto.

 

Samtang, gipahinumduman usab sila ni kanhi Kagawad Enrico Salcedo nga dili magpanuko ang Night Market Committee nga irekomenda ngadto kang Mayor Klarex nga matangtang sa puwesto ang mosupak sa mga gabayan. (ALR/CIO/Photos by Reynan Baylin/CIO)