Andam na ang mokabat sa 17 ka mga teams kon anaa sa 636 ka mga atleta gikan sa nagkalain-laing bahin sa nasud nga magsangka sa ipahigayon nga Mayor's Cup Spring Festival Dragon Boat Race nga ipahigayon dinhi sa dakbayan sa Cagayan De Oro karong adlaw’ng Sabado, Enero 21, 2023.

 

Kabahin ang nasangpit nga Mayor's Cup Spring Festival Dragon Boat Race sa mga aktibidades alayon sa kasaulogan sa Chinese New Year Festival.

 

Ang maong 17 ka mga teams nga mosalmot sa dragon boat race naglangkob sa Kampilan Dragon Boat, Gladiators Davao, Ricspeed, Samal Dragons, ug Amihan gikan sa Davao; RMMC Bluefins Dragon Boat Team nga gikan sa General Santos; Universidad de Zamboanga, Wildcats Paddlers Dragon Boat Team nga gikan sa Zamboanga.

 

Speed Devilz ug Philippine Army Dragon Warriors nga gikan sa Manila; San Jose Banatti ug United Dragonhearts gikan pa sa Negros; Dumaguete Yellowfins nga gikan sa Dumaguete; Dalipuga Dragons sa Iligan; Brgy Carmen Dragon Boat Team, CGY Oro Dragons, BraveDogs sa Cagayan de Oro; ug Hydra Riders nga naglangkob sa mga paddlers gikan dinhi sa Cagayan de Oro ug Davao.

 

Sigon pa ni Oro-TIPC (Trade Investments Promotions Center) chief John Asuncion, kinsa mao usab ang chairman sa Chinese New Year Festival Committee, nga ang maong dragon boat race gibahin sa lima ka kategoriya.

Kini ang Standard Open 300M, Standard Mixed 300M 24 and Under, Standard Mixed 300M Premier, Standard Mixed 300M Masters, ug Standard Mixed Novelty Race, diin makadawat og ganting salapi, tropeyo ug medalya ang mga mananaog.

 

Nasayran nga ang mamahimong kampeon makadawat og P50,000, samtang P30,000 usab alang sa ikaduhang pwesto, P20,000 sa ikatulong pwesto ug P10,000 sa ikaupat nga pwesto.

Ipahigayon ang maong Mayor's Cup Spring Festival Dragon Boat Race diha sa Isla de Oro sugod karong Enero 21 hangtud 22 sugod sa may alas-7:00 ang takna sa buntag. (GDB Photos by Rod Constantino/CIO)