Mokabat sa 28 ka mga magtiayon nga nagpuyo-puyo na ang libreng nakapahimulos sa ‘Kasalan ng Bayan’ atol sa pagpahigayon sa ‘Klarex nga Serbisyo sa Baryo’ diha sa barangay Pigsag-an, Pebrero 4 ning tuig.

 

Mismo si Mayor Klarex Uy, kauban ang mga sakop sa konseho ning syudad, ang nangulo sa simpleng seremonyas sa kasal nga gisaksihan ni Kapitan Sonny Rondahan sa barangay Pigsag-an ug mga residente sa maong barangay.

 

Human sa kasal, gihatagan ni Mayor Klarex ang kada bag-ong kasal nga magtiayon og tag-isa ka letchon, cake ug wine isip pahalipay sa ilang kaminyoon aron na usab adunay mahimong gamay’ng salo-salo sa ilang panimalay.

 

Nakabitbit usab ang matag magtiayaon og tag-lima ka kilo nga bugas gikan ni City Councilor Roger Abaday ug grocery packs gikan ni Liga ng mga Barangay President Alam Lim.

Ang libreng mass wedding kabahin na usab sa mga kalihokan sa City Civil Registry nunot sa kasaulogan sa Civil Registration month ning bulan sa Pebrero. (NLB/CIO)