Giklaro karon sa City Treasurer's Office nga walay pagtaas sa business tax rates ning tuiga dinhi sa dakbayan sa Cagayan De Oro.

 

Nasayran gikan ni Assistant City Treasurer for Operations Engr. Leonil Mistula nga sa kasamtangan gipatuman gihapon ang naandan nga business tax rates sa nakalabay nga mga tuig subay sa ordinansa nga giaprobahan kaniadto pang tuig 2014.

 

Giklaro usab ni Engr. Mistula nga ang pagsaka karon sa business tax collections sa dakbayan bunga na usab sa pagdaghan sa mga patigayon nga nagbukas dinhi sa syudad tungod sa pagluag sa Covid-19 restrictions sugod sa nakalabay’ng tuig.

 

Dugang pa niini, namatikdan nga hinay-hinay nang mibangon karon ang ekonomiya sa Cagayan de Oro human sa kapin duha ka tuig nga pandemya.

Nasayran nga anaa na sa sobra P800 milyones ang nakolekta karon sa City Treasurer’s Office subay sa datos niadtong Pebrero 15, 2023, kon mas taas kini og 25% kung itandi sa susamang petsa sa nakalabay’ng tuig. (GB/CIO)