Mokabat 52 ka mga benepisyaryo ang nakadawat sa entry pass sa ilang bag-ong balay nga gihatag pinaagi sa housing program sa syudad ubos sa administrasyon ni Mayor Rolando `Klarex’ Uy.

 

Ang distribution sa entry pass nahitabo atol sa flag-raising ceremony sa city hall Lunes, Marso 6, 2023, pinaagi sa inisyatiba sa City Housing & Urban Development Department (CHUDD) pinangulohan ni acting dep’t manager Atty. Samuel Rollo.

 

Lakip sa nahatagan mao ang person with disability (PWD) nga si Crestita Abueva nga nagpatabang kang Mayor Klarex nga makabaton siya og balay diin gitubag kini diretso sa mayor pinaagi sa paghangyo sa CHUDD nga atimanon si Abueva.

 

Alayon niini, gipasalamatan sa mga benepisyaryo si Mayor Klarex nga mitagad ug nagpakabana sa ilang hangyo nga makabaton og balay pinaagi sa housing program sa syudad.

 

Samtang dako usab ang pasalamat ni Mayor Klarex kang Atty. Rollo ug sa mga personahi sa CHUDD sa pag-atiman sa mga benepisyaryo ug pagtubag sa ilang mga problema.

 

Ang mga benepisyaryo didto ipahiluna sa nagkadaiyang relocation sites sama sa Macapaya; Pamalihi, Brgy. Pagatpat; CDORSHP 1, Phase 2B; NHA Lumbia Heights; Pagatpat Phase 1; NHA Mambuaya; Indahag Phase 1; Indahag Phase 2; ug GK Shell Calaanan. (ALR/CIO/Photos by Reynan Baylin/CIO)