MUABOT sa 104 ka mga tinun-an sa Grade 9 sa Misamis Oriental General Comprehensive High School kon MOGCHS ang misalmot sa gipahigayon nga ‘adolescent sexuality and reproductive health (ASRH) class kagahapon, Abril 12.

 

Kini gipasiugdahan sa kagamhanang lokal sa Cagayan de Oro pinaagi sa Community Improvement Division, uban sa hugot nga suporta sa MOGCHS, 1st Valley Credit Cooperative ug Royal Victors Eagles Club of CDO.

Kini ang unang higayon nga nakapahigayon ang syudad og ASRH class sa nasangpit nga tunghaan.

 

Tumong sa maong aktibidad nga ma-edukar ug malambigit ang mga kabatan-onan sa hugot nga kampanya batok ‘teenage pregnancy’ aron sa hingpit nga mawagtang o mamenusan ang kaso sa sayo ug dili andam nga pagmabdos.

 

Dumduman sa milabay’ng bulan mismo si Mayor Rolando Klarex Uy ang gapangunay og adto sa komunidad aron mahinabi ang mga ginikanan ug maaghat nga motabang sa pagsumpo sa suliran sa ‘teenage pregnancy’ nga maoy usa sa hinungdan sa kalisod. (AGP/CIO/Photos by CID)