GIKALIPAY ni Mayor Rolando “Klarex” Uy ang pagtugot sa konseho ning syudad pinaagi sa pagpalabang sa Supplemental Budget No. 4 alang sa paghatag og health insurance sa mga kawani sa city hall, ilabina sa mga job order employees.

Kini human gipahibalo ni Mayor Klarex Uy nga adunay dakong pribadong kompanya ang nagtanyag sa syudad og health insurance alang sa mga kawani sa city hall.

Matud pa ni Mayor Klarex mahimo’ng makapili ang mga empleyado sa bisan unsang pribadong hospital kung buot kining mopailawom sa health check-up, lakip admission kung gikinahanglan, nga walay angay kabalak-an sa balayronon.

Gani man, gimandoan na sa mayor ang Human Resource Management Department sa pag-andam sa listahan sa mga empleyado sa syudad aron maandam ang balayronon alang sa maong health insurance program. (ACM/CIO Photos by Reynan Baylin)