GATUSAN ka mga sakop sa senior citizens sa Cagayan de Oro ug Misamis Oriental ang misalmot sa kasaulogan sa ‘Elderly Filipino Week Celebration 2023’ nga gipahigayon sa SM CDO downtown premier kagahapon, Oktubre 2 ning tuig.

 

Kini gipasiugda sa nasudnong ahensya sa National Commission of Senior Citizens, Philhealth Region 10, Department of Social Welfare and Development Region 10, Department of Health Region 10, uban sa hugot nga suporta sa kagamhanang lokal sa Cagayan de Oro pinaagi sa Office for Senior Citizens Affairs (OSCA), City Health Office, ug Mis-Or provincial government.

 

Anaa usab ang suporta sa pribadong sektor sama sa CLIMBS Cares, Kusgan Volunteers, Soriano Foundation ug SM Downtown Premier.

Ang maong kalihokan agi’g pasalamat ug pag-ila sa mabayanihong papel ug legasiya sa mga senior citizens ning katilingban.

 

Atol sa programa, aktibong mipartisipar ang mga senior citizens sa nagkadaiyang kalingawan nga gi-andam alang kanila, ingon man ang paghatag og serbisyo sama sa medical consultation ug libreng tambal.

Ang ‘National Elderly Week 2023’ bitbit ang tema nga: “Honoring the Invaluable Legacy of Filipino Senior Citizens”. (AGP/Photos by Kim Zaldivar/CIO)