Nag-unang prayoridad sa ilusad nga ‘Suroy-Suroy sa Baryo’ program ang paspas nga kasulbaran sa mga mulo ug problema nga ipadangat sa katawhan.

 

Kini ang gipasabot ni City Mayor Rolando ‘Klarex’ Uy atol sa binulan nga tigom sa mga department managers sa city hall kon management committee (ManComm) meeting bag-ohay lamang.

 

Sa program presentation, si City Administrator Atty. Roy Hilario Raagas nagkanayon nga usa ka ‘community diagnosis’ o ‘pre-needs assessment’ ang pagahimoon tali sa mga opisyales sa barangay ug kadagkoan sa city hall aron pagsuta sa nag-unang panginahanglanon sa usa ka komunidad.

 

“Kung atong masulbad ang ilang problema sulod sa usa ka adlaw, mas maayo ug ato kanang himoon. Ang importante nga ilang mabati ang presensya sa gobyerno,” dugtong pa ni Atty. Raagas.

Dugang pa ni Sheila Lumbatan, ang chief of staff sa mayor, nga ang pagtunol sa mga batakang serbisyo ngadto sa mga ‘target beneficiaries’ atol sa ‘Suroy-Suroy sa Baryo’ program mas dali ug nakatutok gayud alang sa mga katawhan nga anaa nanimuyo sa mga lagyo nga sitio sa barangay.

 

Tungod niini, usa ka ‘test run’ ang ipahigayon sa dili madugay diha sa barangay Tignapoloan, Carmen ug Tuburan, sigun pa ni City Tourism Officer Rico Libre, kinsa maoy program coordinator. (CIO photos by Jomar Figuracion)