Bisan ang mga persons deprived of liberty (PDLs) sulod sa City Jail sa Lumbia ang wala pasagdi sa administrasyon ni Mayor Rolando `Klarex’ Uy diin suportado niini ang ilang mga panginahanglan ilabina ang aspeto sa mental health.

Bag-ohay lang, laing hugna sa laughter yoga uban ni Prof. Dixon Yasay ang gipahigayon sa female dormitory pinaagi usab sa ‘Hapsay Buhay Program’ sa syudad.

 

Pinaagi sa maong programa, matabangan ang mga PDLs nga ma-reduce ang stress nga ilang gibati, moubos ang ilang blood pressure ug makatabang usab kini nga makiglambigit sa ilang mga kauban.

 

Ang laughter yoga usa sa mga alternatibo nga paagi pagtambal sa depression, anxiety ug uban pa nga mga mood disorders ilabina sa ilang kahimtang nga layo sa ilang mga pamilya.

 

Gidugang ni Patrick Gabutina sa Hapsay Buhay Program nga adunay laing programa nga ipatuman ang syudad sulod sa City Jail sa mosunod nga mga adlaw.

Nunot niini, gipasalamatan ni Gabutina si Mayor Klarex sa kanunay nga pagsuporta sa mga PDLs. (ALR/CIO/Photos from Hapsay Buhay)