MALAMPUSONG mipailawom sa tulo ka adlaw nga training ang 30 ka mga sakop gikan sa Nahilaran Indigenous Peoples of Dansolihon, out-of-school youth (OSYs) ug Muslim communities sa gipahigayong pilot training sa Microsoft Productivity Tools (Visayan Version) sa pagpasiugda sa City College of Cagayan de Oro bag-ohay lamang.

 

Ang maong training gipangulohan sa Department of Information and Communications Technology Region 10 nga kaubang gimugna sa Coursebank ug pipila ka mga magtutudlo sa Department of Education - Division of Cagayan de Oro.

Ang maong training maoy pasiuna sa Localized Accessible Knowledge and Inclusive Platform (LA’KIP) modules nga ilusad karong Pebrero 13 ning tuig nga adunay dugang 13 ka mga bag-ong modules.

 

Kini nga mga modules maghatag og kahigayonan sa mga estudyante nga makakat-on sa maong kurso gamit ang pinulongang Bisaya.

Lakip sa mga gitudlo ang Microsoft workspace ilabina ang MS WORD ug MS EXCEL.

 

Tumong sa City College of Cagayan de Oro sa pagpangulo ni Dr. Jestoni Babia ubos sa administrasyon ni Mayor Rolando “Klarex” Uy nga mabati ug madala ang serbisyo sa komunidad ilabina ang pagpalambo sa technological skills ug digital literacy. (ACM-CIO/Photos City College of Cagayan de Oro)