Laraw karon sa administrasyon ni Mayor Rolando `Klarex’ Uy nga mabalhin ug makatukod sa bag-ong fish landing gikan sa barangay Bulua ngadto sa gisugyot nga luna.

 

Kini human nag-atubang og problema ang grupo sa Cagayan de Oro Seafoods Wholesaler Association (COSWA), vendors ug uban pang stakeholders sa kasamtangang fish landing area tungod sa nadawat nga notice of violation gikan sa Department of Environment and Natural Resources (DENR-10).

 

Nasayran nga ang kasamtangang fish landing area gipanag-iya sa usa ka pribadong kompanya nga maoy gi-isyuhan sa notice of violation gumikan matud pa sa kalapasan sama sa walay wastewater treatment hinungdan sa kabaho sa maong dapit, ingon man ang kahugaw.

 

Gipasabot ni Engr. Armen Cuenca, department manager sa City Local Environment and Natural Resources Office (Clenro), nga ang syudad na ang magtukod sa fish landing subay sa kamandoan ni Mayor Klarex.

Dugang ni Engr. Cuenca nga gihingusgan karon sa syudad nga mabalhin na ang fish landing karong tuiga aron dili maapektuhan ang mga negosyante.

 

Gani, gihangyo man ni Mayor Klarex ang DENR-EMB nga temporaryo unang tangtangon ang cease and desist order sulod sa usa ka tuig samtang gilihok sa syudad ang pagbalhin ug pagtukod sa fish landing.

Nabalaka usab ang mayor sa posible nga epekto sa ekonomiya sa syudad kon ipatuman gayud sa DENR-EMB ang maong kamandoan. (ALR/CIO)