Dako ang pasalamat ni Carmen Punong Barangay Raineir Joaquin ‘Kikang’ Uy uban sa sakop sa konseho sa barangay Carmen ngadto sa CDO-ICT Task Force Klarex nga Serbisyo sa Kable nga masulbad na ang dugay na nga problema sa mga dead wires o spaghetti wires sa Barangay Carmen.

 

Kini human gipahigayon ang seremonyas sa pagtangtang sa mga spaghetti wires sa Brgy. Carmen karong adlawa Peb. 22, timaan nga sugdan na diha sa maong barangay ang gimbuhaton sa Task Force.

“Dili lang ang kalimpyo ang mabenepisyo sa barangay apan labaw sa tanan ang seguridad sa katawhan,” pamahayag ni kanhi Bise Mayor ug karon PB Uy.

 

Si Mayor Klarex, sa iyang bahin, mipaabot sa pasalamat sa tanang ahensya ilabina ang miyembro sa Task Force nga naghiusa ug nagtinabangay aron malimpyo dili lang ang Brgy. Carmen apan ang syudad sa Cagayan de Oro ug luwas ang mga motorista sa posibleng aksidenti tungod sa mga nagbitay ug wala natangtang nga mga kable.

 

Ang kalihokan gitambongan usab ni City Councilor Roger Abaday, NTC Regional Director Teodoro Buenavista, Chief of Staff Sheila Lumbatan uban sa mga department managers sa city hall. (ALR/CIO/Photos by Jay Arancon, Jomar Figuracion & Rod Constantino/CIO)