Gipahalipayan ni kanhi Bise Mayor ug karon Carmen Punong Barangay Raineir Joaquin ‘Kikang’ Uy ang lima ka benepisyaryo sa Free Patent human nila nadawat ang titulo sa ilang yuta atol sa flag raising ceremony sa Barangay Carmen, Lunes, Pebrero 26.

 

Ang pagtunol gipangulohan ni PB Uy ug 1st Barangay Kagawad Lorna Uy, uban ni Majority Floor Leader Edgar Cabanlas, Clenro Head Engr. Armen Cuenca, CENRO Officer Jerome Pioquinto, ug tibuok konseho sa Brgy. Carmen.

 

Mga molupyo sa Macanhan, Brgy. Carmen ang mga benepisyaryo diin ang syudad maoy nitabang kanila, partikular na sa Task Force Emancipation for Piso-Piso Beneficiaries-Land Asset Management Office (TFEPB/LAMO) pagproseso aron matitulohan ang yuta nga dugay na nilang gi-okupar, inabagan sa CENRO-Initao.

 

Sa iyang mensahe, gipasalamatan ni PB Kikang Uy ang tanang buhatan sa city hall ug ahensya sa gobyerno nga naglihok ilabina ang kagamhanan sa dakbayan ubos sa administrasyon ni Mayor Rolando `Klarex’ Uy aron maangkon sa mga benepisyaryo ang titulo sa yuta.

 

Naglaum ang amahan sa Brgy. Carmen nga daghan pa ang mahatagan og titulo sa yuta kay mao kini ang seguridad nga mahuptan sa benepisyaryo nga ipasunod sa ilang mga anak.

Si Engr. Cuenca mipasabot nga kadtong wala pa nakakuha sa ilang titulo sa yuta magpaabot lang kay kamulo nga giproseso ang ilang mga papel. (ALR/CIO/Photos by Jay Arancon/CIO)