Napili ang dakbayan sa Cagayan de Oro isip pilot city sa Digital Financial Literacy Program sa Pantawid Pamilyang Pilipino Program (4Ps) sa Department of Social Welfare and Development (DSWD).

Kini human pormal nga gilusad ang programa dinhi sa siyudad niadtong Sabado, Pebrero 24, sa city hall quadrangle, diin 50 ka 4Ps beneficiaries ang makapahimulos niini.

 

Nasayrang gi-desinyo ang maong programa sa 4Ps National Program Management Office (NPMO) aron ma-edukar ang mga 4Ps beneficiaries kabahin sa financial literacy, ug magiyahan pag-sustenir sa financial independence, puhon kung mo-gradwar na sila sa programa.

 

Mitambong sa kalihokan si DSWD Undersecretary for National Household Targeting System (NHTS) for Poverty Reduction and 4Ps Vilma Cabrera, kauban si City Administrator Atty. Roy Hilario Raagas, kinsa mirepresentar ni Mayor Klarex Uy; DSWD-10 Regional Director Ramel F. Jamen; ug City Social Welfare and Development (CSWD) Department Unit Head Meriam C. Caducoy.

 

Kini gipaluyohan sa BPI Foundation Inc., Ayala Foundation, Land Bank of the Philippines, GCash, Maya ug LGU-CDO pinaagi sa CSWD. (NLB/CIO/photos courtesy of CSWD and DSWD)