Positibong gitubag sa mga fisherfolks sa pito ka coastal barangays ning syudad ang bag-ohay lang gipahigayon nga Fishing Permit Caravan 2024 human nakaparehistro ang mokabat 442 ka mga mangingisda.

 

Sa talaan sa Agricultural Productivity Operations Office (APOO), nakita nga gawas sa fisherfolks nga narehistro, naka-isyu usab kini og 427 ka fishing permit, ingon man naka-rehistro og 436 ka mga sakayan, diin 260 ang motorized boats, ug 176 non-motorized.

 

Samtang mokabat 482 ka mag-uuma, mananagat ug farm laborers ang nakaparehistro sa Registry System for the Basic Sectors in Agriculture (RSBSA).

 

Gipasabot sa APOO nga gigamit ang RSBSA nga policy instrument ug mahinungdanon nga pamaagi diha sa pagsuta kung eligible ang usa ka mag-uuma ug mananagat nga makabenepisyo sa susamang mga programang agrikultura ug serbisyo sa gobyerno.

 

Ang agrikultura maoy usa sa mga priority program sa administrasyon ni Mayor Rolando `Klarex’ Uy hinungan nga hugot ang iyang pagsuporta sa mga programa sa agrikultura aron matabangan ang mga mag-uuma ug mananagat sa syudad.

 

Ang Fishing Permit Caravan giabagan sa Philippine National Police Maritime Division (PNP-Maritime), Philippine Coast Guard (PCG), ug Philippine Crop Insurance Corporation (PCIC). (ALR/CIO/Photos from APOO)