Makabaton na sa dili madugay og bag-ong covered court balor P4.3 milyones ang sitio Bulao, barangay Iponan human gipangulohan ni Mayor Klarex Uy ang groundbreaking ceremony sa proyekto, adlaw’ng Biyernes, Abril 19 agi’g tubag sa hangyo sa mga opisyales ug katawhan sa maong dapit.

 

Gawas pa niini, ang 2,900 metros kuadrado nga luna plano usab butangan sa mayor og super health center, day care center, stage nga adunay comfort room ug opisina sa senior citizens, lakip pag-semento sa dalan, ug pagkural sa palibot sa covered court.

 

Sa iyang mensahe, gipasalig ni Mayor Klarex nga dad-on sa syudad ang ‘SurUy-SurUy sa Baryo’ sa sitio Bulao aron usab mapahimuslan sa mga residente sa maong dapit, ilabina sa mga senior citizens, ang mga batakang serbisyo sa kagamhanan ning syudad sama sa libreng mga tambal, x-ray, ultrasound, laboratory ug birthday cake sa mga katigulangan, medical ug eye check-up ug dental, supplemental feeding ug uban pa. (CIO)