Ubay-ubay na nga mga unused wires ug kable ang natangtang sa mga personahi sa CDO-ICT Task Force Klarex nga Serbisyo sa Kable diha sa Barangay Carmen, partikular na sa dalan Vamenta Boulevard.

 

Gihingusgan sa task force ang pagkuha sa mga unused wires ug kable sa Barangay Carmen kay usa kini sa mga lugar nga daghang mga wires ug kable nga nagbitay ug sagbot tan-awon.

Pipila na usab ka mga motorista ang nadisgrasya gumikan sa naputol ug nagbitay nga mga wires.

 

Gani, sa gipahigayon nga ceremonial pulling niadtong Pebrero 22, 2024, gikalipay ni kanhi Vice Mayor karon Carmen Punong Barangay Raineir Joaquin ‘Kikang’ Uy nga masugdan na ang pagtangtang sa mga unused wires ug kable kay gawas nga hugaw tan-awon naghatag usab og kakuyaw sa seguridad sa mga motorista.

 

Samtang, gihingusgan ni Mayor Rolando `Klarex’ Uy ang underground cabling system sa syudad, gani, gihangyo man niya ang 20th City Council nga magpalabang og ordinansa alang niini.

Alayon niini, gipasalamatan ni Mayor Klarex ang mga miyembro sa CDO-ICT ilabina si Director Teddy Buenavista sa National Telecommunications Commission (NTC) nga mao ang co-chairman for operation sa task force nga naglantaw ug nagsuporta sa kaayohan sa syudad. (ALR/CIO/Photos from CDO-ICT Task Force)