NAKIGTAGBO bag-ohay lang ang kagamhanang lokal ning syudad tali sa mga private stakeholders alang sa presentasyon sa proposed Comprehensive Land Use Plan (CLUP) diin gipakita ang gisugyot nga walo ka bag-ong ‘development areas’ sa Cagayan de Oro.

 

Ang walo ka ‘proposed development areas’ sa syudad mao ang 1) Uptown, 2) Midtown, 3) Downtown, 4) Highlands, 5) Central Ridge, 6) CDO East, 7) Port Town, ug 8 Coastal Strip,

 

Mao kini ang gisugyot nga mga lugar diin makita ang ‘zoning ug classification’ sa paggamit sa yuta alang sa residential, commercial, industrial, mixed-use development, tourism ug uban pang katuyoan sa umaabot panahon.

 

Kini gipresentar sa City Planning and Development Office ubos sa pagpangulo ni CPDO Officer-In-Charge Chaissa Dulguime atol sa Private Stakeholders’ Consultation Meeting, Abril 16 sa usa ka hotel ning syudad, diin gipresentar ang proposed CLUP sa syudad.

 

Gipasabot ni Dulguime nga ang pag-update sa Comprehensive Land Use Plan maoy sumbanan sa pagpalabang sa zoning ordinance sa Cagayan de Oro, usa ka importanteng dokumento nga mamahimong giya alang sa kalamboan sa syudad sa umaabot sunod nga henerasyon.

 

Si City Administrator Atty. Roy Hilario Raagas, kinsa maoy mirepresentar ni Mayor Klarex Uy, mibutyag nga mahinungdanon kaayo nga madungog ug malakip ang mga sugyot ug huna-huna sa matag sector sa katilingban kinsa maoy makabenepisyo sa CLUP puhon.

 

Ang updated CLUP gilaumang i-presentar ngadto sa Department of Human Settlements and Urban Development (DHSUD) ug Regional Land Use Committee sa National Economic Development Authority (NEDA) alang sa review ug approval pagkahuman sa ipahigayon nga public consultations karong bulan sa Abril ug Mayo. (CIO)