Gawas sa regular nga tahas sa paglimpyo sa mga dalan ug sidewalk gikan sa mga illegal structures, obstructions ug sidewalk vendors, nagpahigayon usab og information drive ang mga personahi sa Quick Response Team Special Operation Group 1 sa Task Group Demolition diha sa Barangays 22, 23, 25 ug 26.

 

Subling gipahibalo ug gipahinumduman sa Movable Action Team pinaagi ni Reymund Seno ang katawhan nga gidili ug usa ka kalapasan ang ilegal nga pagtaud o pagbutang og tent, mamaligya daplin sa dalan, illegal parking ug uban pa nga movable structures ilabina kon nakababag kini ug maoy hinungdan sa pagkabara sa dagan sa trapiko.

 

Gani, mapasalamaton ang TG Demolition sa pagpangulo ni Antonio Resma Jr., kang Punong Barangay Jaime Joshua Frias sa Barangay 23 nga miuban sa grupo ug mitabang pagpasabot sa mga molupyo sa iyang barangay kalabot sa maong katuyoan.

 

Mokabat 13 ka violation tickets ang na-isyu sa mga traffic enforcers sa Roads and Traffic Administration (RTA) batok sa mga unattended nga mga sakyanan ug uban pa nga mga traffic violations.

Kauban usab sa clearing operations ang kapulisan sa Cagayan de Oro City Police Office, ug mga personahi sa barangay. (ALR/CIO/Photos from TG Demolition)