GIKALIPAY ni Mayor Rolando “Klarex” Uy ang dugang kalamboan sa City of College of Cagayan de Oro human midonar ang First Community Cooperative (FICCO) og usa ka wing van alang sa Mobile Training Program sa maong tunghaan.

Kini human pormal nga gilagdaan ni Mayor Klarex ug kadagkoan sa FICCO ang Memorandum of Agreement (MOA) adlaw’ng Huwebes, Abril 11 sa city hall quadrangle, ingon man ang paglusad sa Mobile Training Program sa city college.

 

Lakip sa misaksi sa MOA signing si City Councilor Suzette Magtajas Daba, Ms. Wilma Jane Mulet ang chairman of the Board of Director sa FICCO, Atty Roy Hilario Raagas, Chief of Staff Ms Shiela Lumbatan ug mga kadagkoan ug mga kawani sa City College of Cagayan de Oro.

 

Tumong sa kadagkoan sa city college sa pagpangulo ni Dr. Jestoni P. Babia nga madala ug mahatagan og kahigayonan ang mga interesado nga makatuon apan naglisod sa pagtungha mismo sa city college campus tungod sa kalisod sa panginabuhian.

.

Ang Mobile Training Program sugdan sa 3rd quarter ning tuiga o atol sa pagbukas sa School Year 2024-2025.

Tungod niini, naglaum si Mayor Klarex nga daghan pang kabataan ang mahatagan og kahigayonan nga makabaton og skills training pinaagi sa maong programa. (ACM/CIO Photos by Kim Zaldivar)