Subling ipahigayon sa administrasyon ni Mayor Klarex Uy ang paghatag og libreng kasal kon mass wedding alang niadtong mga magtiayon nga nagpuyo-puyo na sulod sa pila ka tuig.

 

Kini human gipahibalo ni Mayor Klarex atol sa pagpakayab sa nasudnong bandila Lunes sa buntag sa city hall nga moabot sa 114 ka paresan ang iyang kaslon atol sa ‘Kasalan ng Bayan’ nga ipahigayon sa barangay Agusan karong umaabot Sabado, Mayo 11.

 

Ang pagbugkos sa kasal maoy usa sa mga highlights matag pahigayon sa ‘Klarex nga Serbisyo sa Baryo’ outreach program sa city hall, diin si Mayor Klarex mismo ang magdumala sa seremonyas.

 

Sama sa naandan, makadawat ang matag pares sa kinasal og tag-usa ka lechon, cake ug wine isip pahalipay sa buhatan ni Mayor Klarex, gawas sa assorted groceries gikan ni Kagawad Yan Lam ‘Alam’ Lim, kinilo nga bugas gikan ni Majority Floor Leader Edgar Cabanlas ug Kagawad Roger Abaday. (CIO)