GARBO sa dakbayan sa Cagayan de Oro ubos sa administrasyon ni Mayor Rolando “Klarex” Uy nga nasakmit sa labing unang higayon ang tulo ka pasidungog sa “Gawad Edukampyon for Local Governance Awards’ niadtong Mayo 4 didto as kaulohan.

 

Ang tulo ka pasidungog mao ang ‘Gawad Edukampyon for Early Childhood Care and Development’, ‘Gawad Edukampyon for Capacity Development’, ug ‘Gawad Edukampyon for Learning Continuity Plan’.

 

Ang maong kadaugan nakuha tungod sa mga programa sa edukasyon nga gipasiugdahan sa kagamhanang lokal, kauban ang Teach for the Philippines nga mao ang Functional Literacy ug Batang Bayani Program sa tinguha nga mapalambo ang kahibalo sa kabataan ilabina sa pagbasa.

 

Diha sa Functional Literacy diin namugna ang proyekto nga Kurambasa (Kurambos sa Pagbasa) dili lamang mga estudyante sa Grades 1,2 ug 3 ang gitudloan sa pagbasa apan lakip ang mga ginikanan niini ang gihatagan usab og capacity-building workshop aron sila mismo madasig sa pagtudlo sa ilang kabataan.

 

Kini nga mga programa gipangulohan sa Local School Board, Teach for the Philippines ug Department of Education-Division of Cagayan de Oro.

 

Midawat sa maong pasidungog si City Councilor Suzette Magtajas-Daba, kinsa maoy chairperson sa Committee on Education ug Majority Floor Leader City Councilor Edgar Cabanlas nga mirepresentar kang Mayor Klarex atol sa awarding ceremony niadtong Mayo 4.

 

Ang Gawad Edukampyon Executive Committee gilangkoban sa Department of Education (DepED), Department of the Interior and Local Government (DILG), ECCD Council ug Rex Education. (ACM/CIO/photos by Councilor Magtajas-Daba FB page