Aron masuportahan ang industriya sa Abaca dinhi ning syudad, gimandoan ni Mayor Rolando `Klarex’ Uy ang kadagkuan sa Agricultural Productivity Operations Office (APOO) nga magpahigayon og Cluster Formation activity alang sa Abaca growers sa Cagayan de Oro.

 

Kini nagbunga sa pagkamugna sa Cagayan de Oro Abaca Industry Cluster diin ang Man-ai Integrated Agro Forestry Farmers Agriculture Cooperative (MINAFFA) ang natudlo nga primary cluster uban sa tulo ka mga sub-clusters nga mao ang Magayad Higaonon Integrated Abaca Farmers Association (MAHINAFA), Bankers Farmers Irrigation and Communal Water System Association (BAFICWAS), ug ang KM 16 Besigan Farmers, Inc.

 

Si APOO Dep’t Manager Engr. Paterno Gonzales namahayag nga ang kalihokan didto gipahigayon sa Sitio Man-ai Barangay Tignapoloan diin ang mga farmer leaders gikan sa nagkadaiyang kooperatiba ug asosasyon sa mga mag-uuma ang gihatagan og orientation kalabot sa Farm and Fisheries Clustering and Consolidation Program gikan sa Department of Agriculture.

 

Usa ka mahinungdanong resulta sa kalihokan mao ang pag-ugmad sa Cluster Development Plan (CDP) nga nakab-ot pinaagi sa workshop ug panaghisgut uban sa paglambigit sa tanang misalmot nga FCA.

 

Kini nga plano gilauman nga mogiya sa strategic direction sa bag-ong naporma nga cluster, pagpalambo sa pagtubo ug kalampusan sa Abaca industry ning syudad ingon man pagdugang sa production, mas maayo nga market access, ug malungtarong kalambuan sa Abaca growers ning syudad. (ALR/CIO/Photos from APOO)