GIPASABOT ni Mayor Oscar Moreno nga ang gahum sa lokal nga kagamhanan limitado lamang sa pagdeklarar og ‘granular lockdown’ ug wala kini katungod nga ipailawom ang tibuok syudad ubos sa lain nga community quarantine status kung walay pagtugot sa National IATF.

Matud pa ni Mayor Moreno ang ‘granular lockdown’ limitado lamang pagdeklarar og lockdown sa mga kanto-kanto o’ tagsa-tagsa ka barangay ug dili sa tibuok dakbayan.

Dugang niini, mas maayo nga tibuok dakbayan ang mopailawom sa GCQ tungod sa gataas nga kaso sa Covid-19 ug dili limitahan ang lockdown sa pipila lamang ka barangay sa dakbayan.

Apan giklaro usab sa mayor nga ang solusyon anaa sa katawhan nga motuman sa mga gabayan ug minimum public health standards ug wala nakadepende sa lockdown hilabina nga adunay sektor sa komunidad nga mawad-an og panginabuhian kung mopailawom sa lockdown ang dakbayan.

Gipadayag usab ni Mayor Moreno nga dakong epekto sa ekonomiya, ilabina sa mga daily wage earners ang lockdown tungod kay maundang sa pagtrabaho ang mga empleyado sa non-essential establishments kung mas taas pa ang quarantine level sa dakbayan.

Mipasalig ang mayor nga dili niini isakripisyo ang panglawas sa matag indibidwal sa dakbayan lakip usab ang ekonomiya kinsa maoy makahatag og kapasidad sa dakbayan nga makahatag og batakang serbisyo sa mga nanginahanglan. (SPP)