World Health Organization
Department of Health 
MIDEKLARA na og 100% bed occupancy nga gitagana alang sa COVID 19 patients ang Northern Mindanao Medical Center kon NMMC, basi sa taho ni Dr. Bernardo Julius Rocha, liaison officer, adlaw’ng Lunes, Agosto 16.
Matud ni Dr. Rocha nga padayo’ng ipailawom sa CODE RED ang NMMC, sanglit anaa na usab sa 98.85% ang ICU bed occupancy o’ 61 na ang gigamit sa kinatibuk-ang 65 ka ICU beds, samtang 103.89% usab ang isolation beds, diin 108 ang nagamit sa 104 lamang nga available beds.
Samtang, gika-alarma usab sa CDO LGU ang pagdaghan sa mga bata nga nataptan sa COVID 19 basi sa datos sa City Health Office (CHO).
Sa taho ni Dr. Teodoro Yu Jr., medical officer sa CHO, anaa na sa 8% gikan sa bulan sa Hunyo hangtud Agosto ning tuig ang pagsaka sa mga batang nataptan sa COVID 19, kompara sa 3% lamang niadtong Marso diin unang nasinati ang surge sa syudad.
Tungod niini, kinasing-kasing na usab nga naghangyo ang NMMC, CHO ug si Mayor Oscar Moreno sa kooperasyon sa katawhan ug pagsunod sa minimum public health standards aron mapugngan ang grabeng pagsaka sa infection rate sa syudad. (ACM/Photos by Aicy Soriano/CIO/File Photos)
