Hinay-hinay nang misaka ang ihap sa mga pasyente nga naka-recover sa makamatay nga Covid-19 virus dinhi sa Cagayan de Oro.

Kini sigun pa sa taho ni Mayor Oscar Moreno basi na usab sa pinakaulahing report sa City Health Office-Covid19 Emergency Operations Center.

Sumala sa CHO, mitungtong na karon sa 15,158 kon 78.19 percent ang recovery rate sa syudad as of September 26, 2021.

Samtang anaa na lang sa 3,405 kon 17.56 percent ang active cases, diin 2,837 ang naka-kwarantina sa city isolation units ug temporary treatment and monitoring facilities, ug 568 ang admitted sa nagkadaiyang hospital.

As of September 26, miabot na sa 19,386 ang total cumulative cases sa Cagayan de Oro sukad miulbo ang pandemya niadtong Marso 2020.

Nanghinuat si Mayor Moreno nga makaya man ang pagpaubos sa mga kaso basta magtinabangay lang ang katawhan ug ang tibook komunidad sa pagsanta sa coronavirus. (IAF/CIO)