MAGPABILIN sa Alert Level 3 ang dakbayan sa Cagayan de Oro sugod Pebrero 1 hangtod 15 ning tuig human nagpagawas og bag-ong Alert Level System status ang Inter-Agency Task Force (IATF) niadtong Enero 30.

Ubos sa maong alert level status, anaa lang sa 30% maximum capacity ang gitugot alang sa indoor venues/establishments, ug fully vaccinated individuals lamang ang mahimong ipasulod.

 

Samtang, 50% maximum capacity ang gitugot alang sa outdoor venues, ug mahimong makasulod ang partially vaccinated, lakip ang wala pa nabakunahan apan aduna gihapon katungod ang establisemento nga mopatuman sa ‘no vaccination card, no entry policy’.

 

Gibawal pa gihapon ang pagbukas sa mga karaoke bars, concert halls, clubs, cockpits, funfairs ug uban pang susamang establisemento, lakip ang pag-inom diha sa mga pampublikong lugar tungod nga gituohang dinhi paspas ang takod sa Covid-19.

 

Kahinumduman nga sugod pa niadtong Enero 14 gipaubos sa Alert Level 3 ang dakbayan tungod sa pagsaka sa mga kaso sa Covid-19, ug subli kining gipailawom sa maong estado hangtod Pebrero 15 ning tuig. (SPP/CIO)