Gilauman nga mas mosaka pa ang income sa mga bungol nga persons with disability (PWDs) human sila gibalhin pagplastar diha sa activity center sa 2nd floor sa Cogon market.

 

Usa ka simple ug mubo nga programa ang gipahigayon adlawng Biyernes, Enero 28, nga gipasiugdahan sa City Economic Enterprises Department (CEED), ug City Social Welfare and Development Office (CSWD).

 

 

Gibutyag ni Michael Christopher Fabello, executive overseer sa CSWD, nga ilang gikalipay ang maong kalambuan ilabina nga sa niaging tuig pa kini gilaraw ug gisugyot diin iyang gipasalamatan si City Councilor Ian Mark Nacaya kay natuman na gayud ang maong plano pinaagi sa pagtugot ni Mayor Oscar Moreno, uban sa suporta sa mayoriya sa Konseho ning syudad pinangulohan ni Vice Mayor Raineir Joaquin Uy.

 

 

Kini nga kalamboan ang gikalipay sa maong mga PWDs ilabina sa presidenti sa Cagayan de Oro Federation of PWD nga si Maria Liza Corpuz nga mipadangat sa iyang pasalamat sa administrasyon ni Mayor Moreno nga naatiman ang sector sa PWDs.

 

Magsugod sa ilang serbisyo ang mga PWDs gikan ala-1:00 sa hapon hangtud alas-9:00 sa gabii.

 

Samtang, ibalhin usab karong adlawa didto sa East-Westbound Terminal & Public Market (EWTPM) ang grupo sa PWDs nga mga buta diin usa ka programa ang gipahigayon alang sa maong katuyoan. (ALR/Photos by Reynan Baylin-CIO)