NAISYUHAN og ordinance violation receipt ang tulo ka mga establisemento ning syudad human nasapon sa Regulatory Compliance Board nga nakasupak sa social distancing policy.
Atol sa surprise inspection and monitoring sa RCB ubos sa pagpangulo ni Atty. Jose Edgardo ‘Egay’ Uy, naaktohan sa mga otoridad nga wala nakasubay ang maong mga business establishments diha sa Corrales St. ning dakbayan sa’ maximum capacity’ nga gitugot sa food establishments, restobars, ug susamang lugar tungod kay nagpunsisok ang mga customers.
Gipahinumduman ang mga tigdumala sa maong mga establisemento nga bisan pa man nga anaa na sa Alert Level 2 ang dakbayan ug mas luag na ang mga gabayan, apan padayon gihapon nga ipatuman ang minimum public health standards.
Ang pagsupak sa mga ordinansa ug gabayan sa lokal nga kagamhanan mahimong rason nga mapahamtangan og multa, pagpasaka og kaso ug lakip ang pagkanselar sa business permit sa usa ka establisemento. (SPP/Photos by Reynan Baylin)