Dako ang pasalamat sa mga benepisyaryo sa land titling program ngadto kang Mayor Oscar Moreno kay hingpit na nilang napanag-iya ang yuta nga ilang gipuy-an human nahatag kanila ang titulo sa yuta, Lunes, Pebrero 28, atol sa kasaulogan sa adlaw’ng natawhan sa mayor.

 

Gipadayag ni Romelito Nob usa sa mga benepisyaryo nga molupyo sa Macanhan Relocation Project sa Barangay Carmen ug ubos sa kanhi Piso-piso program nga dili na gayud sila mabalaka nga papahawaon sa maong luna tungod sa titulo nga ilang nahuptan.

 

Ang land title distribution gipangulohan ni Mayor Oscar Moreno ug Vice Mayor Raineir Joaquin Uy pinaagi sa inisyatiba sa Task Force for the Emancipation of Piso-Piso Beneficiaries (TFEPB) pinangulohan ni City Councilor Edgar Cabanlas ug TFEPB Executive Director Engr. Armen Cuenca uban usab sa mga kadagkuan sa Department of Environment and Natural Resources (DENR) 10.

 

 

Lakip sa mitambong sila si City Councilors Ma. Lourdes Gaane, Edna Dahino, Jay Pascual, ug Ruben Daba, kauban si Imee Moreno.

 

Ang 25 ka mga benepisyaryo molupyo sa Macanhan Relocation Project sa Brgy, Carmen, Kauswagan Homeowners Association sa Brgy. Kauswagan, Barangay 26 ug Barangay Tumpagon.

Samtang, lakip nga gitunol sa TFEPB ang titulo sa Dr. Jose Rizal Monument, El Pueblo, Amphitheater, Kiosko Kagawasan ug Golden Friendship Park nga gipanag-iya sa syudad nga sa 72 ka tuig karon pa natitulohan.(ALR/Photos by Jomar Figuracion-CIO)