GISUGDAN na sa City Memorial Park Board ang paglubong sa kasamtangang gi-redevelop nga City Memorial Park diha sa kanhi Bolonsori public cemetery karong adlawa, Marso 7, 2022.

 

Matud ni Engr Armen Cuenca, hepe sa City Local Environment and Natural Resources Office (Clenro) ug maoy nangulo sa secretariat sa maong board, nga angayang masabtan sa katawhan nga lakip sa serbisyo sa memorial park ang punerarya ug crematorium nga sa dili madugay mapuslan na usab.

 

 

Gipahigayon usab ang pagbalhin sa mga bukog nga gikalot ngadto sa columbarium.

 

Gipasabot usab ni Konsehal Ian Mark Nacaya nga tinguha sa administrasyon ni Mayor Oscar Moreno nga mahatagan og disente nga kapahulayan ang mga nangamatay ug maprotektahan ang ground water sa syudad gikan sa pagsagol sa formalin sa tubig.

 

Lakip sa misaksi sa unang paglubong si Konsehal Maria Lourdes Gaane, Konsehal Jay Roa Pascual, Ms Imee Moreno, Punong Brgy Pedro Arda sa Camaman-an ug Engr Al Brito, kauban ang mga sakop sa memorial park board. (ACM/CIO)