MAINITONG gidawat sa City Social Welfare and Development Office diha sa CDO Senior Citizens Center ang mga kadagkuan sa Butuan Office for Senior Citizens Affairs ug CSWD-Butuan City atol sa ilang benchmarking activity niadtong Marso 14, adlaw’ng Lunes.

 

 

Ang maong kalihukan gipahigayon tungod kay ang dakbayan sa Cagayan de Oro lang ang nag-inusara dinhi sa rehiyon nga nakasakmit sa Level 2 Senior Citizen Center accreditation nga gipangulohan sa Department of Social Welfare and Development (DSWD).

 

Atol sa benchmarking activity, gihisgutan ang mga rekisitos sa accreditation lakip usab ang mga best practices sa LGU-managed senior citizens center sa dakbayan aron makapasar sa kwalipikasyon nga gitakda sa DSWD Standards Bureau.

 

 

Gipasundayag usab sa CSWD ang bag-o niining programa alang sa mga bag-ohay lang nahimong senior citizens diin ang mga magparehistro atol sa ilang birth month kung kanus-a sila mag-edad og 60 anyos makadawat og welcome gift sugod karong umaabot Marso 21. (SPP)